"आई.सी.यु मा रहेको नेपाली क्रीकेटलाई भेन्टिलेटरमा राखेर मृत घोषणा गर्न पर्खिनुपर्ने हुन्छ"

नेपाली क्रीकेटमा रहेको राजनीतिको वर्तमान अवस्था र भविष्य बारे विश्लेषक सौरभ आचार्यसँग मिम क्रीकेट नेपालको लागि प्रशान्त पौडेलले गरेको कुराकानीको यो अंस तपाईंको लागि,
तपाईंको नजरमा क्रीकेट के हो? -एउटा खेल नै हो । खेलाडीको कि राजनीतिको खेल हो?
-यसमा दुइवटा कुरा हुन्छ । क्रिकेट खेल्ने मात्र सोच भएकाहरुलाई खेलाडीको खेल हो । क्रिकेटमा सधै म हुनुपर्छ भन्ने सोच हुनेहरूको लागि राजनीतिको खेल हो ।
नेपालको सन्दर्भमा यसबारे तपाईंको कस्तो प्रतिक्रिया छ? -नेपाली क्रिकेटमा दुइवटा फरक मनस्थिति छ खेलाडी र क्रिकेटको प्रशाशक हु भन्नेहरु दुबैमा । एकथरी खेलाडी र प्रशासकको सोच क्रिकेटको लागि निस्वार्थ रुपमा केहि गरौ भन्ने छ भने अर्काथरीको सोच क्रिकेटको विकाश होस् या नहोस् तर आफ्नु नाम सधै होस् भन्ने छ । यही दुइ मनस्थिति विचको टकरावको स्थिति हो नेपाली क्रिकेटको वर्तमान अवस्था । नेपाली क्रीकेटको एस्तो स्थितिको जिम्मेवार आखिर को? -यसको जिम्मेवार आफु नै क्रीकेटमा रहनुपर्छ भन्ने मानसिकताको हो । यही मानसिकता परिवर्तन गर्न सकियो भने मात्र नेपाली क्रिकेट अघी बढ्न सक्छ । तपाईंजस्तो राजनीतिक कुरा गर्न सिपालु विश्लेषकले क्रीकेटको बारेमा गर्नुभएको कुरा पत्याउने आधार चैँ के नि? -क्रिकेटमा दलगत राजनीति भएको होइन र छैन । क्रिकेटका प्रशासक हु भन्नेहरूको आपसी राजनीतिको कारण नै नेपाली क्रिकेटको वर्तमान अवस्था पैदा भएको हो । मलाई के लाग्छ भने विगतमा नेपालमा सरकार परिवर्तन सँगै क्यान परिवर्तन हुनु दलहरूको राजनीति भन्दा पनि क्रिकेटको प्रशाशक हु भन्नेहरूको राजनीति नै हो । कुनै पनि सरकारले सोचेर वा बुझेर क्यानको अध्यक्ष कसैलाई बनाएको थिएन । वास्तवमा प्रशाशक हु भन्नेहरु मध्ये जसको निकटको सरकार बन्छ उनिहरु आफै आफ्नो लबिंग गर्न थाल्छन् र आफुलाई क्यान अध्यक्ष बनाउने गर्छन् । हो यसैलाई मैले आफु मात्र हुनुपर्छ भन्ने मानसिकता भनेको हो । त्यसैले म नेपाली क्रिकेटमा दलगत राजनीति छ भन्न चाहन्न र म नेपाली क्रिकेटमा आफै मात्र हुनुपर्छ भन्ने एउटा मानसिकता छ भन्ने गर्छु । र यही मानसिकताको कारण नै नेपाली क्रिकेट दुर्घटना तर्फ जादैछ । क्रीकेटमा आफै हुनुपर्छ भन्ने मानसिकताको कारण के होला?सबैको नजरमा परेको क्रीकेटमा आउने बजेट पचाउन त हैन? -सबैको नजर परेको भनिहाल्न मिल्दैन । सबैको नजर परेको त विगत ४/५ वर्ष मात्र हुदैछ तर नेपाली क्रिकेटको यो रोग धेरै अगाडिको हो । हो तपाईले भनेजस्तै पहिले चाही सबैको नजर नपरेको क्रिकेट क्षेत्रको बजेट पचाउने नै उद्देश्य हो र अहिले त्यतिबेलाको देखिको मानसिकता कायम छ । यस्तो डरलाग्दो समस्याको समाधान के हुन सक्छ? -समाधानको बाटो दुइ वटा हुन सक्छ । पहिलो बाटो भनेको उहाहरु ज-जसले यो मानसिकता बोक्नुभएको छ उहाहरुले आफुलाई सच्याउनु पर्यो र अब नेपाली क्रिकेटको विकाश बाहेक अरु केहि नसोचि काम गर्नेगरि आउनुपर्यो । तर यो पहिलो बाटो म चाही सम्भव देख्दिन त्यसैले आज सम्म नेपाली क्रिकेटको प्रशासकीय भूमिका निभएका सबैलाई अब क्रिकेट बाट पर राखेर दोश्रो विकल्पमा जाने हो । दोस्रो विकल्प चैँ के होला? -दोश्रो विकल्प भनेको पूर्व न्यायाधीशको नेतृत्वमा पूर्व खेलाडी , खेल पत्रकार, फ्यान क्लबहरुका प्रतिनिधि सम्मिलित एउटा समन्वय समिति बनाउने र उक्त समन्यव समितिले विधान अनुरूप जिल्ला अञ्चल क्षेत्र हुदै केन्द्र सम्मको निर्वाचन गर्ने र एकदमै नया नेतृत्वलाई नेपाली क्रिकेटको जिम्मा दिने । वर्तमान समयमा आफुलाई नेपाली क्रिकेटको ठेकेदार सोच्ने जो कोहि पुराना प्रशाशक बाट नेपाली क्रिकेटको विकास सम्भव छैन । पुरानो प्रशासनलाई सजाय नदिई नयाँ प्रशासन ल्याउँदा नयाँ प्रशासन पनि प्रभावकारी नहुने होकि? -पुराना प्रशासकलाई क्रिकेट बाट टाढा राख्ने । उनिहरुलाई सजाय भनेकै त्यही हो । नया प्रशासकहरुलाई नियममा राख्ने । देश अहिले संघीय प्रणालीमा गएको छ त्यसैले बढीमा ३ वर्ष संघीय क्रिकेटको नेतृत्वमा बस्न पाउने र बढीमा २ वर्ष केन्द्रीय क्रिकेटको नेतृत्वमा बस्न पाउने गरि बढीमा जम्मा ५ वर्ष मात्र क्रिकेटको नेतृत्व गर्न पाउने नियम बनाउन जरूरी छ । यसो गर्दा अब आउने नया नेतृत्वलाई काम गर्ने बनाउन सकिनेछ । यसका अतिरिक्त अरु के हुन जरुरी छ? -नेपाली क्रिकेटको उत्थान यतिले नै हुने होइन । यो त सुरुवाति चरण मात्र हो । यो भनेको घर बनाउन जग हालेको मात्र हो । बाकी सबै काम त्यसपछि सुरु हुने हो । तर के बाट र कहा बाट सुरुवात गर्ने भन्ने त फिक्स हुनुपर्यो । सुरुवात यहा बाट गर्ने हो । नेपाली क्रीकेट प्रति सरकारले खासै मतलब नगर्नुलाई तपाईं के भन्नुहुन्छ? -नेपाली अस्थिर राजनीतिमा सरकारले आफैलाई बचाउन सकिरहेको छैन उसले यो अस्थिर अवस्था धेरै ध्यान दिने अपेक्षा राख्नु नै गलत हुन्छ । आफैलाई बचाउन नसकेको सरकारले क्रिकेट बचाउन सक्दैन अहिले । क्रिकेटको निम्ति सरकारले गर्ने भनेको बजेट दिने नै हो तर त्यो खर्च गर्ने के मा भन्ने त क्रिकेट प्रशासकहरूको कुरा हो नी । त्यसैले सरकारले यो अवस्थामा केहि गरेन भन्ने पक्षमा म छैन । अहिलेको अवस्थाबाट नेपाली क्रीकेटको भविष्य कस्तो देख्नुहुन्छ? -त्यो त अब नया विधान जारी गरेपछि नै थाहा होला तर पुरानाहरूको भेला बाट गरिने र पुराना डेट एक्सपायर प्रशासकहरुलाई नै प्रशासनको जिम्मा दिएर अघी बढ्दा क्रिकेटको विकाश चाही नहोला जस्तो लाग्छ । जसरी डेट एक्सपायर औषधिको कारणले विरामीको ज्यान नै जान्छ त्यसरी नै अब पनि हामीले यि डेट एक्सपायर प्रशासकहरू नै रोज्यौ भने आईसीयू मा रहेको नेपाली क्रिकेटलाई भेन्टिलेटरमा राखेर मृत घोषणा गर्न पर्खिनुपर्ने हुन्छ ।